Meiri lán.....virkar það?

Ég get ekki séð hvernig þetta á að ganga upp.

 Við vitum það alveg sem lifum venjulegu lífi dags daglega að ætla að borga skuldir með því að taka meira lán gengur bara upp, upp að vissu marki. Þegar komið er yfir vissan punkt er ekki hægt að ná í halann á skuldunum alveg sama hvað reynt er. Það sem gerist þegar svo er er að við förum í gjaldþrot.

Miðað við útreikninga AGS eru gjaldþrotsmörk Íslands 240 % af vergri landsframleiðslu. Við erum nú þegar einhversstaðar yfir 200 % og fer hækkandi.

Til þess að mæta þessum lánagreiðslum, sem ég tel vera hæpið að við getum yfirhöfuð verði hægt að standa við, verðum við með ÖLLUM ráðum að fara í massífa fyrirtækja og atvinnu-uppbyggingu innanlands, þetta höfum við mörg verið að hrópa upp um allan tímann.

Stjórnin virðist ekki hugsa dæmið alveg til enda vegna þess að það eina sem þau leggja til er Fjárfestingssjóður sem mun endurfjármagna og lána fyrirtækjum sem eru þjóðhagslega hagkvæm....fyrirgefið að ég segi það en í dag er HVERT einasta fyrirtæki þjóðhagslega hagkvæmt svo lengi sem það er að velta einhverjum peningum í þjóðfélaginu.

Við verðum að fara í grunnvinnuna hérna heimafyrir varðandi fyrirtæki og atvinnu og það helst fyrir 6 mánuðum síðan.

Rússalán í höfn

Leikur að tölum....

Líður okkur ekki öllum miklu betur með að vita að heildarskuldir landsins eru líklega 2.800-3.000 milljarðar ? Eru ekki allir bara sáttir við lífið og tilveruna með þessa vitneskju í farteskinu.

Sko þetta er samt vel yfir 200 % af vergri landsframleiðslu og slagar ennþá vel uppí 240 % gjaldþrotamörk AGS, en iss þetta er sko minna en 4.000 milljarðar og þá hlýtur hver íbúi landsins að sjá að allt er þetta bara í góðum gír.

Hve lengi á farsinn í S og VG að fá að halda áfram á sviðinu? 

Vandamálin í dag eru hverri flokkstjórn ofvaxinn og fólk ætti að sjá sóma sinn í að viðurkenna þá staðreynd. Ég myndi bera smá snefil af virðingu fyrir þeim stjórnmálamanni sem stæði fram í dag og segði "Þetta eru svo stórvægileg mál að við ráðum ekki við þau, við köllum eftir þjóðstjórn skipaða óháðum fagaðilum, við gerum það vegna þess að við berum hag og velferð þjóðarinnar fyrir brjósti" 

Slíkri manneskju myndi ég klappa fyrir í dag.

Stefna í að vera yfir 200%

Skjaldborg heimilanna.....kemur frá bönkunum?

Það virðist sem skjaldborg sú sem núverandi ríkisstjórn lofaði muni koma frá bönkunum sjálfum, kaldhæðnislegt.

Margir voru þeir sem töluðu um strax í haust að koma þyrfti til afskrifta á skuldum einstaklinga, fyrir það þvertóku bæðu S og VG. Nú er staðan raunverulega þannig, að vegna aðgerðaleysis stjórnvalda erum við að tala um afskriftir, líklega í massavís fyrir heimilin.

Hefði ekki verið betra að keyra inn Biðreikningafrumvarp F eða þess vegna 20 % afskriftir B á sínum tíma. Eða er það eilíft viðkvæði  að það verður að láta fólk fara í þrot áður en því verður hjálpað.

Ég held að eitthvað hafi Norræna Velferðarstjórnin okkar misskilið orðið forvarnir, svona eins og þau virðast hafa misskilið orðasamhengið Norræn Velferðarstjórn.

Ráðþrota gegn úrræðaleysi

AGS og Norræna velferðakerfið

Hverjum datt í hug að hægt væri að byggja upp Norrænt velferðakerfi með aðkomu AGS? Það mun aldrei ganga upp og liggur í hlutarins eðli.

AGS er frjálshyggja og einkavæðing pure. AGS er ekki að lána ríkinu pening svo fólkið í landinu geti haft það gott, heldur til þess að krónan haldi kurs og styrkist ( sem er ekki að takast). Þeir vinna aðeins með þessa hluti og ekki það manneskjulega.

Hve gróteskt er svo að vera með vinstri stjórn sem ætlaði að byggja upp norrænt velferðakerfi, þangað til að þau föttuðu að það verður ekki gert svo lengi sem AGS er við völd í landinu. Vinstri stjórnin sem slík hefði getað gert góða hluti ef... þau hefðu haft kjark til að henda AGS út, taka aðra stefnu í Icesave og byggja upp með annarri hugmyndafræði þegar kemur að atvinnu og fyrirtækja uppbyggingu.

Það verður ekki hægt að byggja upp Norrænt velferðarkerfi hér svo lengi sem AGS er við völd, til þess er hugmyndafræðin of ólík.

Hefur einhverju dottið í hug að kannski væri gott fyrir okkur að einangrast í smá tíma og finna aftur styrk okkar, kjark og þjóðareinkenni? Þetta er bara eins og alkinn eftir langt fyllerí þá fer hann í meðferð, lokar sig af í sínum hóp og byggir upp.

Þarf ekki íslenska þjóðin að gera það sama og er þá svo hræðilegt að einangrast í einhvern tíma? Ég sé það bara ekki sem einhvern hræðilegan dóm yfir okkur sem þjóð heldur sem besta tækifæri sem við höfum fengið í áratugi.

Stýrivextir áfram 12%

Kaus ég um Icesave?

Ég er orðlaus, ég sat pallborð með hinum háum herrum S.J.S og fleirum fyrir kosningar og mér er lífsins ómögulegt að muna að einhvern tíma í öllum þessum pallborðum hafi nokkurn tíma komið til tals að við værum að fara að kjósa um Icesave.

Ég man aftur á móti gjörla eftir því að Steingrímur talaði mikið um og fór stórum um að þetta mál væri skandall og ekki ætti að ana að neinu í sambandi við það. Einnig fór hann mikið um hagsmuni þjóðarinnar.

Samfylkingin lauk öllum sínum svörum á ....og svo göngum við í ESB en töluðu annars ekkert um Icesave.

Ég tel mig ekki vera haldna elliglöpum af einhverju tagi, en ég get með engu móti munað það að ég hafi verið að kjósa um Icesave.

Heldur þingheimur að þjóðin samanstandi bara af fíflum? Er hrokinn svo mikill að þetta fólk heldur að hægt sé að kasta hverju sem er fram og því sé bara tekið þegjandi og hljóðalaust? Eða er það kannski þannig?

Þjóðin kaus um Icesave í apríl

Óreiðumanneskjan

Mér finnst þessi sameiningarmálflutningur alltaf athyglisverður. Það á alltaf að setja okkur undir einhvern hatt þegar fólk eins og Gylfi og fleiri tala.

Ég er til dæmis ekki óreiðumanneskja og mun líklega ekki verða það héðan af. Ég hef ekki verið óreiðumanneskja í fjármálum, víndrykkju eða einhverjum öðrum hlutum sem hægt er að verða óreiðulegur í.

Það á alltaf að höfða til heiðursins og stoltsins í okkur þegar svona er sagt.

En Gylfi það er nokkuð ljóst að í öllum vestrænum og siðmenntuðum þjóðfélögum stillir maður ekki einum litlum kalli upp í horn og segir" þið fáið ekki fyrirgreiðslu nema..... þið verðið að taka þennan samning no matter what" Þannig virkar það bara ekki og kannski stjórnmálamenn okkar ættu að kynna sér samningagerð. Yfirleitt er þetta eins og að fara á markað á Ítalíu og prútta.

Annar kemur með lausn og hinn kemur með gagnlausn og svona gengur þetta þar til nokkuð ásættanleg niðurstaða hefur fengist fyrir báða aðila.

Ég get ekki séð að það hafi verið gert í okkar stöðu og mér finnst ESB verðmiðinn vera farin að kosta ansi mikið og það áður en við erum svo mikið sem stiginn inn fyrir með annan fótinn.

Hvernig ætli þetta verði ef við erum keyrð þarna inn? Ja manni er spurn.

 

Getum staðið við Icesave

Misskilda Norræna velferðakerfið á Íslandi

Við gengum til kosninga í lok apríl eftir miklar hamfarir. Það sem við fengum út úr því var vinstri stjórn sem lofaði norrænu velferðakerfi.

Eitthvað hafa þau Jóhanna og Steingrímur misskilið hið norræna velferðakerfi. Kannski þau hafi hreinlega ekki kynnt sér hvað svoleiðis kerfi býður upp á. Ég bjó í einu ágætis norrænu velferðakerfi í mörg ár og verð að segja að það sem nú gerist hér á landi er alger andhverfa slíks kerfis.

Bara svo það sé á hreinu þá gengur norrænt velferðakerfi út á jöfnuð og lífsskilyrði fólks í landinu. Það gengur út á að heildin geti lifað af í samfélaginu og eigi fyrir nauðsynjum. Til nauðsynja myndu teljast húsnæði, hiti, rafmagn, vatn og matur og oft á tíðum menntun og læknisþjónusta. Allavega svona í nútímasamfélagi.

Fyrir kosningar fóru bæði Jóhanna og Steingrímur fögrum orðum um þetta fína kerfi sem þau myndu standa fyrir að byggja upp. Því miður hefur það sýnt sig að vera loftbóla að öllu leyti. Á okkur dynja hækkanir allsstaðar og ekki sér fyrir endann á þeim.

Fyrir mína fjölskyldu þýðir það, þó við höfum verið ágætlega aðhaldssöm í fjármálum, keypt ódýrt hús (sem hækkaði um 3.7 mill á nýja fasteignamatinu)  o.s.fr. að mjög líklega munum við enda í frystingu, lengingum og togunum með húsnæðislán, segja upp öllum tryggingum sem eru ekki bílatrygging og svo framvegis.

Með nýju fínu bensínhækkununum þýðir þetta að það borgar sig ekki fyrir mig að keyra í vinnuna upp á Egilsstaði daglega sem mun líklega enda með að ég hætti í vinnu.

Þetta eru framtíðarhorfurnar á mínu heimili.

Ég gæti sætt mig við þetta allt og tekið ábyrgð á þessu ef ég hefði farið hamförum í fjármálasukki og útrás og þetta væri sjálfri mér að kenna, en það gerði ég ekki og núna er ég svo reið að steininn í maganum á mér stækkar bara og stækkar.

Ég vil persónulega þakka fyrri og núverandi stjórnvöldum fyrir að plan B heima hjá mér þessa dagana er að flytja erlendis aftur, þó að ég hafi komið heim til landsins míns fagra vegna ættjarðarásta og ætlaði ekki aftur út.

 

 

 

Nei við Icesave og þjóðstjórn

Þetta er alveg orðið eins og versti farsi. Það segir sig sjálft að eignir Landsbankans hafa rýrnað alveg eins og eignir allra annarra um víðan völl þessa dagana. Hvers vegna ættu eignir Landsbankans að vera eitthvað öðruvísi ?

Það verður að stoppa þennan samning, núna STRAX. Það er ekki hægt með neinum snefil af samvisku að samþykkja hann í núverandi mynd. Ég skora á alla þingmenn með smá taugar til lands og þjóðar að segja nei.

Það er alltaf verið að agetera fyrir því að ef þetta verður ekki samþykkt verðum við útilokuð úr samfélagi þjóðanna, engin vörusviðskipti og engin lán.

Sorry en það er ekki hagur Englands og annarra kröfuhafa að íslenskt efnahagskerfi hrynji því þá fá þeir ekkert af aurunum sínum til baka. Ef við einöngrumst verður það kannski í 2-3 ár í mesta lagi. Þegar kemur að lánshæfi erum við nú þegar mjög illa sett og það mun ekki batna eftir að við tökum þetta á okkur, það er órökrétt með öllu að lánshæfismat aukist þegar ríki skuldar hærri fjárhæðir en það gerði áður.

Við þurfum þjóðstjórn samansetta úr öllum flokkum ásamt fagaðilum til að vinna í þessum málum. Þetta er of mikið fyrir hvaða flokkastjórn sem er. Það verður að stíga á bremsuna og taka málin yfirvegað og málefnalega með hag okkar sem þjóðar í fyrirrúmi.

Eignir duga ekki fyrir Icesave

Úr stjórnaskránni, áminning

Úr IV. kafla stjórnarskrár Lýðveldisins Íslands, nr. 33/1944:40. gr. Engan skatt má á leggja né breyta né af taka nema með lögum. Ekki má heldur taka lán, er skuldbindi ríkið, né selja eða með öðru móti láta af hendi neina af fasteignum landsins né afnotarétt þeirra nema samkvæmt lagaheimild.
41. gr. Ekkert gjald má greiða af hendi, nema heimild sé til þess í fjárlögum eða fjáraukalögum.Enn fremur, úr VII. kafla stjórnarskrárinnar:77. gr. Skattamálum skal skipað með lögum. Ekki má fela stjórnvöldum ákvörðun um hvort leggja skuli á skatt, breyta honum eða afnema hann.
Enginn skattur verður lagður á nema heimild hafi verið fyrir honum í lögum þegar þau atvik urðu sem ráða skattskyldu.Úr X. kafla almennra hegningarlaga nr. 19/1940, n.tt. um landráð: 91. gr. Hver, sem kunngerir, skýrir frá eða lætur á annan hátt uppi við óviðkomandi menn leynilega samninga, ráðagerðir eða ályktanir ríkisins um málefni, sem heill þess eða réttindi gagnvart öðrum ríkjum eru undir komin, eða hafa mikilvæga fjárhagsþýðingu eða viðskipta fyrir íslensku þjóðina gagnvart útlöndum, skal sæta fangelsi allt að 16 árum.
Sömu refsingu skal hver sá sæta, sem falsar, ónýtir eða kemur undan skjali eða öðrum munum, sem heill ríkisins eða réttindi gagnvart öðrum ríkjum eru undir komin.
Sömu refsingu skal enn fremur hver sá sæta, sem falið hefur verið á hendur af íslenska ríkinu að semja eða gera út um eitthvað við annað ríki, ef hann ber fyrir borð hag íslenska ríkisins í þeim erindrekstri.
Hafi verknaður sá, sem í 1. og 2. mgr. hér á undan getur, verið framinn af gáleysi, skal refsað með fangelsi allt að 3 árum, eða sektum, ef sérstakar málsbætur eru fyrir hendi.Það að skuldbinda ríkið án þess að lög mæli svo fyrir er brot á stjórnarskránni.
Það að gera leynisamning

Er Feigðarós II á næsta leyti?

Því miður hefur Sigmundur nokkuð til síns máls.

Ég held að flestir sem hafa nennt að kynna sér AGS bara pínulítið, viti það að þeir standa vörð um fjármagnseigendur. Ég hef ekki ennþá í leit minni á netinu rekist á skjal þar sem talað hefur verið um AGS sem einhverja hjálp við þjóðir eða lífskilyrði fólks.

AGS er frekar Friedmann-ískt í uppbyggingu og eins og flestir vita var hans meginmarkmið að einkavæða allt sem hægt var og keyra inn algjörlega frjálshyggju uppbyggt kerfi. Það kerfi tekur ekki tillit til réttar fólks í launamálum eða lífsskilyrðum.

Icesave málið er allt á versta veg alveg sama hvernig því er stillt upp. Hvernig samist hefur byggir í raun á mistökum frá upphafi. Við erum nokkur sem höfum verið að ræða það að það er alveg undarlegt hvernig var brugðist var við þegar hrunið varð. Ríkisstjórnin hefði þeim tíma átt að senda fulltrúa sinn til þessara landa til viðræðna STRAX. Sá fulltrúi hefði með réttum áherslum getað komið því þannig fyrir að við hefðum getað haft allan tíma í heiminum (næstum því) til að semja um þetta mál.

Ef viðkomandi hefði einfaldlega sagt " Kæri Brown, við á Íslandi stöndum frammi fyrir stærsta hruni í sögu landsins, stjórnvöldum ber skylda til, með hagsmuni þjóðarinnar að leiðarljósi, að fá yfirsýn yfir málið fyrst og svo semja við ykkur þegar niðurstöður liggja fyrir" Þá hefði þurft að beygja sig undir það, við sem þjóð erum nefnilega ekki bara viljalausir Zombies í höndum stórþjóða. Hvaða stjórnvöld sem er í hinum siðmenntaða heimi hefðu skilið þessi rök.

Það að stjórnin sé að riða til falls kemur manni ekkert á óvart. Málin sem eru upp á borðinu eru of stór fyrir hvaða flokkastjórn sem er. Það er alveg á hreinu að á meðan það fólk sem situr innan veggja þingsins breytir ekki sínum viðhorfum til vinnunnar, hugsunarferlis og viðbragða munum við ekki komast út úr þessu, þó að við mundum kjósa 5 sinnum á ári.

Að mínu mati þurfum við þjóðstjórn sem er sett saman úr öllum flokkum til jafns við fagaðila, þingið í núverandi mynd verður lagt niður tímabundið og mótaðir verða hópar sem hver um sig sér bara um eitt málefni.

Þau málefni væru Icesave, AGS, skjaldborg heimilanna og fyrirtækja og atvinnu-uppbygging. Það er hægt að stofna einn ESB hóp ef fólk vill, en á núverandi tímapunkti er það ekki aktuelt mál að mörgu leyti.

Hver hópur vinnur sín mál með fagaðilum innan tímamarka og þegar launsar hugmyndir eru komnar upp á borðið eru þá kynntar fyrir þjóð og þingi (hinum hópunum) til samþykktar eða höfnunar.

Slagorð allra hópana er : Hvað þjónar hagsmunum okkar sem þjóðar best.

Það sem er að gerast núna í þjóðar og stjórnmálum mun að öllu leyti, ekki stýra okkur út úr þessum vandræðum. Hin íslenska þjóð verður líka að láta vita að henni misbýður. Við getum alveg verið viss um það að það er enginn sem mun gera það fyrir okkur, nema kannski Eva Joly. Á meðan við bíðum eftir að aðrir geri eitthvað brennum við út á tíma og gætum endað í stöðu sem hlekkjar okkur fjárhagslega sem þjóð um ókomna áratugi.

Getum við verið þekkt fyrir að láta hana draga allt hlassið fyrir okkur? Það finnst mér ekki en hvað finnst þér?

„Fjarar undan stjórninni"